كيفية التعامل مع الطفل العنيد وتخطي مرحلة العناد ؟

كيفية التعامل مع الطفل العنيد وتخطي مرحلة العناد ؟

العناد صفة تأتي في مرحلة من مراحل العمر للأطفال وغالبا تبدأ مابين عامين او ثلاثة أعوام حتي عمر السادسة وتبدأ تختفي هذه الحالة من الطفل,حسب طريقة التعامل مع الطفل وأحتوائه في هذا السن المبكر ..

وصفة العناد أنواع , كما أن العند يختلف درجاته من طفل الي آخر , فمثلا :

طفل بيرفض الأمر أو الطلب , و طفل بيتأخر عند القيام بتنفيذ الطلب, و طفل بيعمل الأمر ولكن يصحبه بزن مستمر أو عصبيه , و طفل يميل للعند بعدوانيه ..

كيف تساعدي طفلك لتخطي مرحلة العناد ؟

كيف تتخطي مرحلة عناد طفلك ؟

الكثير من الأباء والأمهات دائمي الشكوي في ان أبنهم مش بيسمع الكلام !! او قول أبني رأسه ناشفه وعنيد !!

في عمر سنتين ورأسه ناشفه وعنيد ؟ هل تسائلت أيها الأب او أيتها الأم لماذا أبني هكذا في هذا السن ؟

الحقيقة ان الأبناء بيكتسبو الصفات من الكبار , فـ الأب او الأم  يمارسون ضغطوط علي الطفل لسماع وتنفيذ الطلبات ويصرون عليها, فالطفل بيكتسب هذا الأصرار ويطبقه بشكل عكسي ثم يشتكي الأباء من عناد الطفل !! وعدم سماع الكلام ( لاء مش عايز أكل ,لاء مش عايز ألبس ,لاء مش عايز أعمل) ..

Child stubborn / الطفل العنيد

تعالو نتعرف علي معلومات عن العناد وكيفية التعامل معه :

العناد بيكون في سن صغير من سنتين لأربع سنين لعمر السادسة ,اذ ما تعاملنا مع الطفل العنيد صح .

هناك عناد إيجابى ومعناه ان الطفل بيبدأ يكون شخصيته المستقله,و درجة العند هنا بتكون لدي الطفل درجة خفيفه و غير مزعج لأفراد الأسرة, إلا في حاله قسوة الأباء وفرض السيطرة علي الأبناء.

– الطفل المطيع طول الوقت ودائما ينفذ الكلام وعلي لسانه حاضر طول الوقت, الطفل دا غالبا بيعاني من تأخر في نموه النفسي و العقلى ..

كيفية التعامل مع الطفل العنيد ؟

ويأتي العناد في الصور التاليه :

اغسل أسنانك قبل النوم ,الطفل اما يرفض يغسل أسنانه.

أو

 يغسل أسنانه ولكن بعد ما طلب منه بفتره طويله حتي يتلذذ بأنه لم ينفذ ماطلب منه إلا عندما يريد ,كنوع من الأستقلالية ومن أجل ان يعند مع الكبير .

أو

 يتصرف الطفل بطريقه غير لائقة لكسر القواعد .

أو

يتملكه الغضب ويتصرف تصرفات غريبة لتغير الموضوع كأن يأخذ لعبة أخيه او يفسد شيئ ما او يلقي بالماء علي الأرض ..

كل هذه التصرفات تدل علي عدم رغبته في تحقيق ماطلب منه ولكن في عدة اشكال , وهذا علي سبيل الأمثلة فقط وليست علي سبيل الحصر لما يقال عن طقلهم (طفل متوسط العناد – طفل كثير العناد – طفل عنيد متسلط – طفل عنيد و زنان).

ماهي أسباب العناد ؟ 

– كثره الضغوط والقيود علي الطفل تجعل منه طفل عنيد .. أفعل هذا و لا تفعل هذا , وفي البيت ألعب هنا و هنا لاء , متنطش علي الفوتيه , مافيش جري في الصالة, كما ان هناك توجيهات من الأب والم ويعتقدون أنها مثاليه ولازم أبنهم يتبعها , وهي في الحقيقة توجيهات تعجيزية للطفل ,فليس المطلوب من الطفل ان يكون طفلا مثاليا من وجهه نظر أبويه الطامحين في الكمال !!

 الطفل من حقه ان يمارس مايرغب ووقت ما يرغب لأنه طفل وليس كبير , عليه ان يلعب ويجري وينط ويكسر ويسكب ليتعلم من أخطاؤه مهارات جديده سيكتشفها بنفسه , عندما يسكب الماء علي الأرض فسينزلق علي الأرض وسيتعلم , هنا دور الأم او الأب بألا يعنفاه , على عكس يوضحون له بهدوء ان الماء علي الأرض قد يؤدي الي انزلاق أحد الأفراد ومن بينهم هو , فأذا ما فعل مرة ثانية وانزلق سيعلم انه لم ينفذ ماقيل له وهذا نتيجته , لأن طبيعه الطفل تجعله يحتاج ان يكتشف ويجرب ويتحرك حتي  يتعرف على كل شيئ يحيط به من هذا العالم , ويبدأ يحس ان هناك ممنوعات وأشياء كثيرة بتتحكم فيه ومن هنا يتوتر ويعند حتي يسترد حريته وحقوقه.

 – العنف والقسوة في التربيه او الضرب ,بيولد حالة العناد , ولو تكرر هذا العنف او الضرب حنلاقي ان الطفل بدأ يبلد او يشعرك أنه لم يتألم وليس فارق معه الضرب ويبدأ يقول متوجعتش وهو أكيد موجوع جسديا ونفسيا بس لكي يعند مع الكبير وحاول يصون كرامته ويستردها ولكنه من الداخل حزين ويشعر بالقهر !!

 – عند كثرة الوعود دون تنفيذها , فالطفل بيحتاج ألعاب او حاجات بيحبها ويطلبها لنفسه, و نوعده اننا حنجبها له و نرجع في وعدنا له, دا بيخليه يفقد الثقة في كلامك وأحساسه بأحتياجه للحاجة دي فيؤدي الي عناده لما يطلب منه أي طلب.. طب ليه هو حيلبي الطلب والكبير رجع في كلامه !!! أعقلوها كده .

 – و كمان الطفل بيقلد كل تصرفات الكبار في سنوات عمره الصغيره وبيأخذ منهم الأنطباعات وبتشكله ليكون نسخة مصغرة من الكبير, يعني حيمارس العند معاكم لأنه بيشوف ماما و بابا بيعندو مع بعض, أو الأخوات الأكبر سناً منه او المقربين لكم من العمات والعمام والخالات …

 أيه الحل نتصرف أزاى مع الطفل العنيد ؟

طرق علاج عناد الطفل

خلينا نتفق علي أن العناد ده أسلوب مكتسب سواء من البيت او في أسلوب التربيه ,أو مكتسب من البيئه المتواجد فيها الطفل , و لو أهمل الأهل التربيه السويه للطفل ,كده حنربيه علي العناد ويكبر ويكون زوج عنيد أو زوجه عنيده مما يسبب الي انهيار في  العلاقات وتفرق الزوج والزوجة والأطفال.

فلابد من مراجعة هذا الكلام جيدا مع نفسنا كل ننسي او كل ما نفقد السيطره علي أنفسنا نرجع نقرأه تانى ونعرفه لغيرنا كمان.

أولا قبل اي حاجه في كل العلاقات سواء مع كبار او صغار لأن الصغار بيشوفو ويتعلمو حتي لو لم يمارس معهم, نأخد بالنا من طريقه الأسلوب في طلب الأشياء حيسبب في عناد أو حتجبره بلطف أنه يعملك طلبك عن رضي وحب .

نصائح للتعامل مع الطفل العنيد

1 – اعملي جلسة بينك وبين طفلك واتفقو مع بعض علي جدول بالأعمال اليومية و يتلزق على الحيطه.

 2- بمعني انك تتفقي معاه وتعرفيه كل حاجه مفروض تمشى أزاى , تاني اهم حاجة ان القواعد دي تتحط بمشورته وعامليه بالمثل لأنك أكيد مش حتوافقي حد يحط لك نظام يومك من غير ما يأخد برأيك .. صح و لا غلط ؟

3 – امنحيه الكلام الجميلة اللي يحب يسمعها كتير وتحسسه بالثقة في النفس والحب مثل : يا حبيبى – بحبك كتير – أنت جميل – أنت ذكي – أنت بتفكر حلو – التصرف دا جميل منك – أنا فرحت لما لقيتك عملت كدا ,كلام الحب ضروري للطفل العنيد لأنه بيكون حساس جدا .

4- وجهي طفلك بطريقه غير مباشرة مثل :

 – تبقي فكرني أغسل أسناني قبل ما أنام ( علشان يقلد أفضل ما أطلب منه , وكمان يحس بالمسئولية واني محتاجه له يفكرني) .

– تعالي ساعدني في الحمل الثقيل دا (يشعره بالقوة) .

– مين حيسبق ماما في ترتيب اللعب؟ (المنافسة).

5 – خدي رأيه وشاركيه وضعي بدائل له مثل : ( أيه رأيك التلفزيون ساعه واحدة في اليوم , تحب تشوفه الصبح ولا قبل النوم ؟,

عايز المصروف تشترى بيه لعب و لا عايز حاجات تانية, لأن مصروفك بالمبلغ ده لمدة شهر , ولا عايز تدخره تجيب حاجة أكبر ؟ و هكذا

6- تذكري أن طريقة التسلط بتظهر في الكلام ودا حتجعله عنيد و عصبي.

7- ضرورة التواصل بشكل يومي لكل طفل علي حدا مع الأب و الأم ,مجرد ربع ساعة تمنحه الحنان والود ,دا حيمنع العناد,لأن الطفل حيشعر بقيمته عند والديه و مش حيضطر يلجأ لاى تصرف ليسترد ذاته.

8- التعامل مع بأسبوب متحضر وراقي حتي تكوني قدوه له ( لو سمحت – من فضلك – شكرا ياحبيبي في أى طلب تطلبه منه).

9- العقاب علي شكل (معاد النوم في التاسعة مثلا , لو تأخرت في الذهاب للنوم نص ساعة مثلا , يبقي الكرتون أو البلاى ستيشن حنخصم من وقتهم بالمثل و ده يبقي اتفاق بينكم يطبق بحب وود , و بحسم و حزم من الكبير .

10 – ممنوع الضرب بتاتاً, لأن كده يتولد لديه عدوانيه وعناد ,و لو الطفل من النوع الحركى حيتصرف ببلطجة.

11- وضع البدائل له , من المهم ان تمنحيه البدائل وحرية الأختيار مثلا : ( عايز تأكل دلوقتى و تاكل كمان نص ساعه ؟ كده حسستيه أن له رأي وشخصيه مستقله يقدر يختار .

12 – أحكي له قصص كتير او أقرأي له قصص مناسبة لسنه ودخلي المناقشات في اطار القصص , حتوسعي فكره ويقدر يعبر عن رؤيته من خلال المناقشات الفعالة دي ,  ودايما القصه يكون لها هدف تسعي إليه عن طريق سلوك عايزة تعدليه فيه , و تخليه يتناقش معاكي في السلوك اللي في القصه .

13- أخبريه انك محتاجه لدعمه حتي تهدأي من التوتر او حالة العصبية وعن الطريقة اللي ممكن تعمليها علشان الغضب يروح

و لما يحاول يساعدك أبدئي في الراحة والهدؤ و , وأتعلمى التنفس بعميق أمامه 5 مرات حتي تهدئى و الطفل يكتسب الأسلوب دا ويطبقه وقت الغضب .

14 – فهميه سبب أنك عايزة الحاجة دي تتم دلوقت ,مثلا عايزاك تخلص واجباتك علشان جننزلو بعد الظهر او علشان نقدرو نلعبو بالليل سوا او نتفرج علي فيلم ,او  تنام في ميعادك علشان تقدر تقوم الصبح نشيط تلحق ميعاد المدرسه, حتي يدرك انك بتحبيه وعايزة مصلحته وليست مجرد أوامر وطلبات.

15 – عامليه بالمثل حتي يستجيب لك,لما ينادى عليكي ردي علي طول طالما فاضية, لكن أوقات بنكون بنتفرج علي التلزيون او علي الموبايل ونعمل نفسنا مسمعتش,انما لو رديتي هو حيتعلم يرد علي طول.

16 – تجاهل بعض التصرفات والعناد حتي لا نكبر عنده , وبلاش كلمة انت عنيد علشان حتعجبه ويقول خلاص انا عنيد ..

 17 – عدم التدليل الزائد للطفل و عدم تلبيه جميع طلباته وخصوصاً خارج الأتفاق أو لو كانت من الممنوعات, لانه حيحاول يضغط بأسلوب مش عايز اكل, محاولة منه عن طريق العند لتلبية طلباته..

وأخيرا : تكلمنا عن كيفية التعامل مع الطفل العنيد وتخطي مرحلة العناد ؟,عن طريق بعض من النصائح لتخطي سن العناد عند الطفل .

فضلا : أذا أعجبك هذا المقال أترك تعليقك وأنشره بين أصدقاؤك لتعم الفائدة علي الجميع,شكرا للمتابعة.