كيف نقدم لك حلول لمشكلات كثيرة تدور في رأسك .
كيف تعيش سعيد في بلدك بجد دون الحاجة لعناء الغربة ؟
الغربة عن الوطن ليست بالأمر الهين , يعني حتسيب بيتك وأهلك وحبايبك وناسك وتسافر للمجهول , ياصابت يااااا .. طب ليه كل دا ؟ , تعبان في بلدك ومش عارف تحقق أحلامك وطموحاتك ومش حاسس أنك سعيد !!! , شايف ناس كتير حواليك وصلو لهدفهم وأنت لسه في مكانك .. طب مش يمكن العيب فيك أنت , أو بمعني أصح المشكلة عندك أنت ومحتاج تبذل جهد اكتر في نقاط معينة تقدر تسعد بيها نفسك , أزي بقي أنا حقولك ياسيدي , وجرب يمكن تبقي سعيد وتدعيلي ..
– اشتغل علي قد ماتقدر , منها تلهي نفسك , ومنها توفر فلوس تساعدك تعمل اللي نفسك فيه, أصل الفلوس مش حتيجي تخبط علي بابك يعني , لازم تتعب شوية .. أكيد متفقين علي كده .. علي رأي الشاعر أحمد شوقي : (وما نيل المطالب بالتمني ولكن تأخذ الدنيا غلابا) ..
– حاول علي قد ماتقدر تقرب كل حاجة محتاجها من البيت , لان مع تغيير الجو والزحمة حتلاقي بتضيع عمرك في انتظار الإشارات وفي زحمة الكباري , خلي تعاملاتك كلها جنب البيت علشان تحافظ علي صحة نفسيتك .
– أياك والنكد , أياك والنكد .. بمعني ابتعد عن الشخص الشكاي , بمعني أي حد يقعد يكلمك عن مشاكله او مشاكل غيره , وكلام ينكد ويصدر لك طاقة سلبية, بلاش منه !!! طب يعني اعمل أيه ؟ لو عندك الحل يبقي تمام حتكسب ثواب , ولو ماعندكش ابتسم ابتسامة عريضه , وقوله “خير إن شاء الله محلولة” وأمشي .
– حاول علي قد ماتقدر وخصوصاً في وقت الفراغ , تعرف علي ناس إيجابية , او لو تعرف حد يبقي حلووو قوي , اتكلم معاه واكتسب منه , بس خد بالك اياك وعدم الشكوي له علشان حتلاقيه هرب منك .
– احمد ربنا علي اللي عندك وقدر دا ,عشان في غيرك معندوش حاجات كتير , وحاول تساعد الناس وخصوصاً كبار السن والأطفال , حتلاقي نفسك فرحااان وعندك طاقة جامدة .
– أهم حاجة بقي تجاهل الفرجة علي التلفزيون , دا لو حبيت تحافظ علي قواك العقلية, كل واحد بيقول كلام وحاجة توجع الدماغ بجد , تابع اللي انت عايزه علي اليوتيوب you tube – او علي جوجل او النتفليكس Netflix , أقولك روح سينما او مسرح مع صحابك .
– علشان تطلع الطاقة السلبية اللي جواك , العب رياضة .. الرياضة بتساعد في تفريغ الطاقة السلبية , وحتساعدك تاكل اللي بتحبه براحتك … الأكل البلدي حلو أوي.
– اعمل أي حاجة بتحبها , زي مثلاً روح اتفسح علي البحر او في جنينة , اقرأ كتاب او قصة شيقة , أكلة حلوة قنبلة من الأخر يعني , سافر أعمل عمرة او مارس عبادة تغذي الروح , ألعب رياضة مفضلة , أشرب كاسة قهوة معتبرة علي السبرتاية , او هوت شوكليت .. بمعني تاني (اعمل دماغ لنفسك بأي حاجة حلوة) .
– سافر اتعرف علي المحافظات اللي في بلدك , حتكتسب معلومات وخبرات جديدة وتعرف علي طباعهم وعوايدهم , ومصاريف السفر اعتبرها مصاريف علاج وترفيه .
– زور الأماكن السياحية الموجودة داخل بلدك , حتعرف قيمتها وحتعرف قد إيه هي حلوة .
– ابسط نفسك , ازاي أقولك .. هات هدية لنفسك تكون بتحبها , زجاجة برفان , او تيشرت حلو او حتي كيلو هريسة وأشكر نفسك عليها , ماهولازم تفرح نفسك بنفسك متستناش الفرحة تجيلك من حد , (مخبيش عليك ممكن تستني كتيررر ) ..
كيف تعيش سعيد في بلدك بجد دون الحاجة لعناء الغربة ؟
وأخيراً :
أفرح علشان الدنيا حلوة ولازم تعيشها صح مش كده ولا أيه ؟
فضلا : إذا أعجبك هذا المقال أترك تعليقك وأنشره بين أصدقاؤك لتعم الفائدة علي الجميع,شكرا للمتابعة.
